CONCLUSIONES

ALCUENTRU de SOLdePAZ PACHAKUTI

"LES SEMIENTES PATRIMONIU DE LOS PUEBLOS EN BENEFICIU DE LA HUMANIDÁ. REFORMA AGRARIA PA LA PAZ Y LA SOBERANÍA ALIMENTARIA"

Siero, Asturies, 23 y 24 d'abril del 2004.



SOLdePAZ valora y agradez l'asistencia de:

ANAMURI Chile. MST Brasil.FENSUAGRO Colombia.Federación del Trópico de Cochabamba. Bolivia.Sindicato Labrego Galego.Universidá d'Uviéu.Plataforma Rural. Cambalache.Picu Rabicu.GAR.Grupu de Sofitu MST Córdoba.CODEHCO.Plataforma escontra'l Plan Colombia.La Osa.GAIU.Cooperativa Makila.MinKa-Centru de promoción y solidaridá .CAES.Ecoloxistes n'Aición.Grupu de Teatru "otra tierra".Conceyu Siero.

Axencia Asturiana de Cooperación al Desarrollu.



ENTAMU.

“La tierra ye de to, pueblu, la verdá ñació contigo, del to sangre” (P. Neruda).

Reconozse por parte les axencies internacionales qu'alredor de 800 millones de persones sufren de fame a diario y en tol mundiu y d'elles el 30% viven en campu.

Hasta se tien demostrao científicamente que la fame nun ye productu de factores climáticos, nin de la incapacidá de los pueblos y les persones pa producir los sos propios alimentos, sinón qu'esti fenómenu apavoriante, criminal, ye productu d'un modelu económicu que va atropando cada vegada más en poques manes factores productivos básicos, como la tierra, l'agua, el capital, inclusive en delles rexones la mano d'obra.

La fame en mundiu xurde d'un modelu qu'esclúi a centenes de millones de persones per aciu de los denomaos procesos de modernización agrícola que mercantilicen y privaticen les tierres, l'agua y los alimentos, xenerando, ensin pagar por ello y ensin que se-y pidan cuentes, un descomanáu procesu de fame y estrocena d'ecosistemes, persones y cultures.

Les teunoloxíes modernes y les decisiones en materia de población aplicaes por esti modelu tán empobinando arrémente, calculadamente, al desaniciu en masa de la economía campesina y de los pueblos indíxenes, non solo nos países del sur, tamién nos países “desarrollaos”.

Esti modelu económicu y social que xira alredor de la concentración de los recursos del mediu rural, allampa por controlar la producción d'alimentos patentando y apropiándose de les semientes y de la vida y por adueñase de la tierra y los territorios curiaos polos pueblos orixinarios per aciu de planes d'inversión denomaos megaproyeutos, recurriendo a les guerres, al desplazamientu masivu y forzáu de millones de persones, al remanamientu y privatización de la vida humana, animal y vexetal, nuna carrera d'avaricia y abusu de la ñatura qu'amenaza con destruyir tamién al planeta.

Ser, alimentase y tener cultura propia son drechos hestóricos, ancestrales.

Nin siquier son asuntos sobre los que deba o pueda entamase discutiniu colos gobiernos de les naciones del mundiu. Son, cenciellamente, drechos naturales consustanciales al fechu humanu de ser “seres vivos con conciencia de selo”.

Poro, son drechos inalienables que tán fuera de tou alderique, constitúin un imperativu moral, una categoría especial recoyida pol sentíu común y por toles declaraciones universales, como'l Drechu Internacional Humanitariu o la Declaración Universal de los Drechos Humanos.

Pero a estos drechos irretrucables enfréntase-yos el capitalismu agroindustrial y el so enfoque productivista y l'atropamientu de les tierres en poques manes.

Ye precisamente dende la posición humanista de que “tou pueblu tien drechu a ser y a producir los sos alimentos”, “les semientes patrimoniu de los pueblos al serviciu la humanidá” y “reforma agraria pa la paz” que mos axuntemos xente campesino y urbano de dos continentes nesti alcuentru internacional entamáu por SOLdePAZ PACHAKUTI na villa de La Pola del conceyu Siero, Asturies, una fastera verde de la resistencia nel norte la península Ibérica.



1-. ASPEUTOS LLEGALES DE LA PROSPEICIÓN XENÉTICA.

Nin la ciencia nin la téunica son neutrales y menos na fastera del control de los recursos naturales nin na de la manipulación de los productos alimenticios, onde hai claros porgüeyos populares y privaos.

La inxeniería xenética ye una área novedosa del conocimientu dominada poles empreses multinacionales que tienen la mesma racionalidá del sistema imperante, esto ye, la d'algamar la máisima tasa de ganancia posible, porque, anque la prospeición xenética mos la presenten con mázcara filantrópica, nun son quien a esconder el so porgüeyu, l'interés monopolizador sobre la ufierta d'alimentos, los descomanaos intereses comerciales a la tema, como son les empreses d'Estaos Xuníos y Europa.

La inxeniería xenética ta enredando cola comida del mundiu, magar los riesgos ya insegurances qu'hai sobre los efeutos de la manipulación, poro, prefierse'l principiu de cautela empara de lo que desixen les multinacionales y les autoridaes de comerciu.

L'oxetu d'investigación pa la inxeniería xenética ye principalmente la bayurosa biodiversidá qu'hai nos países del sur, que ta al algame de les multinacionales pola permisividá de los gobiernos dependientes de los países colonizaos y pola ruina regulación no que se refier a los drechos de propiedá intelectual o sistema xeneral de patentes, al que ye menester atopa-y alternatives, como:

Nueves formes de rellación norte-sur pa curiar les cultures y la biodiversidá.

Denunciar a les multinacionales que s'aprovechen de la so posición dominante nel mercáu y de los furacos llegales.

Considerar les semientes como “patrimoniu común de los pueblos al serviciu la humanidá” y non xenéricamente como “patrimoniu de la humanidá” pa evitar la seudofilantropía y l'apropiamientu d'un bien común por porgüeyos particulares.

De toes toes fai falta lluchar por preservar el patrimoniu común de los pueblos, darréu que nun tamos dispuestos/es a almitir el dominiu absolutu y ensin control de los intereses privaos.

Los pueblos tenemos qu'oponemos a les patentes sobre la vida, inclusive si se reconocieren patentes a nome de los pueblos o comunidaes.

La manipulación xenética nun va resolver el problema de la fame en mundiu como nun lu resolvieren los avances de la teunoloxía agroindustrial, yá que'l fondu d'esti asuntu son les comenencies comerciales y la distribución.

Poro, tenemos qu'aporfiar en siguir la escoyeta natural y la manipulación segura prauticada polos/es campesinos/es, que crucien variedaes llariegues p'añiciales ensin esterilizales nin monopolizales.



2-. PUEBLOS Y ALIMENTACIÓN.

Un alimentu nun ye un simple productu, nin una mercancía, trátase de daqué básico pa la vida que tenía que tar fuera la publicidá engañosa y de cualesquier manipulación comercial.

L'espoxigue de la producción intensiva d'alimentos ta xenerando serios problemes:

De salú a les persones.

D'estabilidá a los ecosistemes.

De sostenibilidá a rexones enteres del planeta.

De desnutrición a centenes de millones de seres humanos.

De monopolización del comerciu.

De desaniciu de la economía campesina y pueblos indíxenes.

D'instrumentalización de les rellaciones humanes ente productores y consumidores.

La llucha de los pueblos pol so drechu a alimentase requier:

De perfondes reformes agraries que reorganicen l'usu de los suelos, den puxu al abastecimientu alimentariu de los pueblos, afiten la organización campesina ya indíxena, que reconozan l'aporte de les muyeres rurales y permitan el so accesu a los factores productivos y respeten a la naturaleza.

Del reconocimientu de que tou pueblu campesín ya indíxena tien drechu a esistir nos sos territorios y coles sos cultures.

El drechu de producir los sos alimentos asegurando calidá, cantidá y preciu xustu.

Asegurar pa los pueblos l'accesu a les tierres, les semientes, l'agua.

Reconocer que ye meyor producir más lento y más seguro que la velocidá del enfermizu productivismu agroindustrial.

Perfeccionar la organización social de base que tien como xera hestórica la defensa de la soberanía alimentaria, llabor nel que nun tien que pretendese l'ésitu inmediatu yá qu'esta llucha precisa paciencia, insistencia, decisión de facer y de deprender faciendo.

Ser conscientes de que consumir ye una decisión económica d'altu conteníu políticu, poro, fai falta entamar y educar nel consumu colos principios de salú, xusticia, necesidá básica, solidaridá.

Los pueblos d'América tenemos que siguir oponiéndomos al Área de Llibre Comerciu de les Amériques, ALCA, y a los trataos de comerciu pautaos de costazu a los drechos de los pueblos. Tenemos que lliberar a les semientes, secuestraes pol gran capital y denunciar el nefastu papel que xueguen los bancos na destrucción per aciu intereses d'usura pa les unidaes de producción campesines.

Señalar como perversu l'usu hestóricu de la violencia como instrumentu de los terratenientes p'apropiase de tierres y territorios nun procesu que destrúi persones, cultures y soberanía alimentaria, como ocurre en Colombia.

Los que decidieron que nun esista la economía campesina nin los pueblos indíxenes cuenten con que nun va haber respuesta masiva, pero esi ye'l retu: la construcción de resistencia, de procesos alternativos a agricultura ecolóxica, ensin monocultivos y siempre dientro de la economía campesina.

Al aparatu de propaganda engañosa alredor de los alimentos manipulaos, enlatados, cabe opone-y la denuncia na cadena de difusión popular, insistiendo nes bondaes de la producción campesina.

N'Europa hai esperiencies importantes de trabayu n'economía campesina con estrencha rellación direuta ente productores y consumidores.



3-. POLÍTICA AGRARIA COMÚN EUROPEA, PAC.

La PAC ñació na posguerra y derivó nuna política d'industrialización de la producción en beneficiu del mercáu, o seya de los capitales privaos que monopolicen la producción y cada minutu acaben con un pequeñu productor d'Europa.

La PAC foi reformada varies vegaes. Agora va camín d'eliminar les polítiques agraries públiques, eliminar tamién los controles na alimentación y enanchar les desixencies del capital de trabayu por unidá de producción, permitiendo -beneficiándose- de la sobreesplotación de la mano d'obra inmigrante nes esplotaciones grandes.

La PAC desestabiliza a la sociedá rural en cada país como se ve cola descampesinización-despoblación de grandes rexones n'Europa, poniendo a les persones del continente nuna situación d'inseguranza alimenticia, de perda de soberanía alimentaria.

Amás, cola política europea de d'apurrir subsidios a les grandes esplotaciones agropecuaries del norte, tracamúndiense los costos reales de producción y quiébrase a les economíes campesines del sur.

La OMC y la PAC son responsables de fenómenos como la fame en mundiu, l'estrozu'l mediu ambiente, el sabotax al Pautu Mundial Cafeteru, que quebró a los campesinos colombianos y obligólos a semar cultivos illegales; tamién les empreses de l'alimentación tienen intereses na guerra executada col Plan Colombia, que pon en riesgu a los campesinos y pueblos indíxenes del área Andino-amazónica.



4-. PROPUESTES ORGANIZATIVES DE RESISTENCIA DEL MUNDIU RURAL.



MST BRASIL.

Convivir ye la base del entendimientu ente pueblos y ente persones. Convivir colos más probes permitió a Paulo Freire entender que naide enseña a naide, y que toos/es tenemos conocimientos qu'aportar.

Nun fai falta qu'un pueblu-y diga a otru qué tien que facer. Cada pueblu tien na so hestoria los elementos p'avanzar nos sos conocimientos, pa facer, pa organizase.

Y ye menester recoyer les sensibilidaes de los pueblos, como la gran preocupación de los pueblos del norte en cuantes al tema del mediu ambiente y la ñatura.

Los modelos d'organización dalos la naturaleza: por exemplu, una panoya foi creada pola ñatura granu a granu, asina, con procuru, desinterés, paciencia, amor, conocimientu, ye como se construyen les organizaciones sociales, aprendiendo a tar sollertes, abiertos y clandestinos pa curiar los construyío día a día, pensando nel futuru y en que tol trabayu va forxar un nuevu mou de producción.

La llucha enfréntase con allegría, con esperanza, poro, organizativamente nun vamos pa escontra una “primavera silenciosa”.



ANAMURI-Chile.

La propaganda del gobiernu chilenu de que vivimos meyor qu'otros países de Llatinoamérica ye falsa. Una visita a les zones campesines y a les comunes de la periferia urbana amuesa la vergoña de la perfonda desigualdá qu'avanza.

Les muyeres chilenes lluchen escontra la desigualdá y escontra la discriminación na sociedá y nos puestos de trabayu. Nesa xera ponen per delantre como organización l'autonomía frente al Estáu al nun aceptar dineru públicu, la capacitación, la educación y la salú como exes de trabayu y como pegoyos centrales.



BOLIVIA.

Yera conveniente ente alcuentros, valorar los cambeos políticos y los llogros organizativos algamaos nel periodu.

Considerar nel norte la posibilidá de nun consumir productos que resulten dañibles pa les comunidaes del sur.

Resaltar el valor de les decisiones coleutives. Incluso anque tuvieren enquivocaes porque ellí depréndese y porque ye meyor enquivocase faciendo que tar callaos.



FENSUAGRO-Colombia.

La organización, la comunidá que decide hacia ónde dir, siempre ye más importante que l'individuu porque dende ella defínense con posibilidá d'ésitu asuntos como les estructures, modelu de desarrollu, modelu económicu, drechos de propiedá.

Y la organización, col pasu'l tiempu y nel facer concretu, va orientando coleutivamente los conteníos y ritmos de los cambeos.

Nestos tiempos, el capitalismu idea nueves formes de control y esplotación perdisimulaes de les persones, presentándose como "amigu", pero calteniendo'l fondu de ganancia, manipulación, les violaciones de los drechos humanos...

FENSUAGRO tien una estructura que va dende los comités llocales, bredales o de barriu, hasta'l Congresu de delegaos con énfasis nel trabayu d'organización de les muyeres.

Magar los asesinatos de dirixentes y afiliaos de base, FENSUAGRO nun se dexa desaniciar; tán formando una nueva xeneración de xóvenes dirixentes.

Tener munchos afiliaos nun ye abondo: fai falta tener una visión clara y coleutiva de "lo qu'hai que facer" incluyíes les aliances con sectores urbanos.

Dalgunos de los criterios d'organización son: sabiduría, paciencia y formación, coordinación con otros campesinos n'aliances yá probaes, como Vía Campesina y colos pueblos indíxenes, que tienen una capacidá de resistencia más que demostrada.

Delles formes de trabayu a recuperar coles cooperatives y empreses comunitaries, toles formes de trabayu y consumu a comuña ya incluyir na educación dende guah.es el tema alimentariu.

Y ye prioritario trabayar organizativamente p'aparar les guerres y agresiones como la que sufren en Palestina, Iraq, o'l pueblu de Colombia qu'asiste al desaniciu en masa de les cultures y persones del campu.

Ye perimportante l'articulación de movimientos del mediu rural y l'urbanu y que les organizaciones y movimientos políticos reivindiquen a les clares al campesináu y el so papel.

La humanidá pasa per un momentu trescendental yá que fracasó'l modelu económicu, la guerra, el productivismu agroindustrial y fai falta organizase pa ser alternativa.

Propónse celebrar el día del arguyu campesín pa contrarrestar fórmules de propaganda que xustifiquen el so desaniciu; y celebrar el primeru de mayu con énfasis na rellación campu-ciudá como una vieya alianza que nun tien que s'abandonar; alcordase de que tamién tenemos compromisos personales práuticos y teóricos lo mesmo nos hábitos de consumu como nes aiciones de tresformación social.

Los pueblos tenemos que mos proponer ser autosuficientes en materia d'alimentos, democráticos dientro de les nueses organizaciones y tener claro que se semen ilusiones y esperances.

Acolúmbrase de lloñe'l llogru organizativu más importante nos caberos años nel mundiu rural, ye'l MOVIMIENTU RURAL “VÍA CAMPESINA”, que yá suma a persones de cuatro continentes a partir d'organizaciones nacionales y llocales qu'avancen n'articulase pela base.

Si lo algamen, el sistema mercantilista y alimentariu encontáu na ganancia y el productivismu alredor de les multinacionales va tar n'apuros mui serios y los pueblos a un mizcu d'algamar el suañu de la llibertá de les semientes y de la vida, como s'amosó nos conceyos de la OMC, au les propuestes ya intenses movilizaciones de Vía Campesina fueron quien a frañir daqué l'axenda neolliberal destructiva.

VÍA CAMPESINA engambó globalizar la esperanza y l'alderique sobre temes claves güei, como la soberanía alimentaria, la tierra pa los/es campesinos/es, los territorios pa los/es indíxenes, el drechu a esistir, producir y alimentase, la importancia del trabayu de les muyeres y los drechos humanos.

Y allampa, con millones de campesinos/es ya indíxenes en tol mundiu, por coordinar la llucha xeneral de los pueblos basaos na importancia de la organización social, la verdá, el facer concretu, que ye onde los pueblos mos empoderamos y deprendemos faciendo, recuperando pal xéneru humanu les tierres, los mercaos llocales, les semientes, l'agua, reivindicando no concreto la conseña mundial de “pan, tierra, trabayu, llibertá”.