Xunta Xeneral del Principáu

Proposición non de Llei referente a los Drechos de los Pueblos Indíxenes.»

Esposición de motivos:

»Hai nel planeta más de 370 millones de persones, nos cinco continentes, que se declaren y reconocen como pertenecientes a un pueblu indíxena. La diferencia y la diversidá cultural, encarnada pola peculiaridá carauterística de cultures subalternes, como la de los pueblos indíxenes en tol mundiu, constituyen un patrimoniu vivu de tola humanidá y una pertenencia insustituyible pa les xeneraciones futures.

»Conscientes de que los pueblos indíxenes foren oxetu, dende l’empiezu del colonialismu y hasta l’actualidá, d’un fenómenu de negación de drechos, depredación de cultures y espoliu de recursos, que llevó al desaniciu material y espiritual de munchos d’ellos, asina como a la precariedá vital de la totalidá de los pueblos indíxenes sobrevivientes; y convencíos de que la propia sobrevivencia de los pueblos indíxenes depende del reconocimientu y garantía de los drechos humanos, de los qu’a títulu individual y coleutivu son titulares toos estos pueblos, y de que l’ataque sistemáticu a toos estos drechos amenaza gravemente la continuidá d’estes cultures.

»Resueltos a apoyar los esfuercios que les organizaciones indíxenes encarnaren na recuperación, per medios pacíficos, de los espacios de debate públicu, nacional ya internacional, col propósitu de sensibilizar a la opinión pública sobre esta situación de desamparu y agraviu hestóricos.

»Conocedores de mui recientes avances que, a nivel internacional, sobre manera nes Naciones Xuníes, y gracies al enorme llabor d’instancies como’l Grupu de Trabayu sobre Poblaciones Indíxenes, el Foru Permanente sobre Asuntos Indíxenes y el Rellator Especial sobre la situación de los drechos fundamentales de les persones indíxenes, se materializaron; y de la urxencia d’un llabor d’acompañamientu y apoyu a estes iniciatives, dende los ámbitos llocales y rexonales.

»Conocedores de la declaración de l’Asamblea Xeneral de Naciones Xuníes de la década 2004-2014 como Segundu Deceniu Internacional de los Pueblos Indíxenes.

Celebrando que por fin l’Asamblea Xeneral de Naciones Xuníes aprobare la Declaración Universal de los Drechos de los Pueblos Indíxenes, el pasáu 13 de setiembre del 2007.

»Conscientes de les iniciatives qu’otros parllamentos, lo mesmo’l Parllamentu Européu, na so resolución sobre les midíes internacionales necesaries pa una proteición efeutiva de los pueblos indíxenes del 1994, qu’otres Comunidaes Autónomes del Estáu, talo que la Declaración Institucional del Parllamentu Vascu del 1996, o la proposición non de llei del Parllamentu de Cataluña del 1999, y nel Parllamentu d’Andalucía nel 2006, llevaren a cabu en términos asemeyaos a los qu’agora se proponen.

»Considerando l’ampliu respaldu y esplícitu sofitu d’organizaciones asturianes de cooperación al desarrollu y otros actores implicaos de la sociedá civil asturiana, asina como les firmes d’apoyu roblaes nel día internacional de los Pueblos Indíxenes pola Conseyería de Xusticia del executivu asturianu.

»Por tolo espuesto enantes, somete a l’aprobación la siguiente proposición non de llei:

»Puntu primeru. La Xunta Xeneral del Principáu proclama y reconoz:

»1. Tolos drechos reconocíos en declaraciones de los drechos de los pueblos indíxenes, aprobaes pola Asamblea Xeneral de Naciones Xuníes el 13 de setiembre del 2007, y en particular el drechu de los pueblos indíxenes al plenu y efeutivu esfrute de tolos drechos humanos, incluyendo’l drechu a la llibre autodeterminación, acordies colos instrumentos internacionales en vigor, ensin discriminación dala nel so exerciciu y fundada na so condición de pueblu, nel sentíu que’l Drechu Internacional-y da a términu talu.

»El drechu de los pueblos indíxenes a l’autoidentificación.

»El drechu de los pueblos indíxenes sobre les sos tierres, territorios, los sos hábitats y los recursos naturales del suelu y subsuelu, y la biodiversidá qu’unos y otros contienen, con plenu respetu a la especial rellación de talos pueblos cola tierra.

»El drechu de los pueblos indíxenes a determinar la so ciudadanía, acordies coles sos propies decisiones, vezos y tradiciones.

»El drechu a una xurisdicción propia.

»El drechu a determinar llibremente la so condición política y a persiguir llibremente’l so espoxigue económicu, social y cultural.

»Tamién proclama y reconoz el drechu de los pueblos indíxenes a participar activamente, en situación d’igualdá y ensin restricción dala, en tolos foros internacionales nos que se debatan los estándares internacionales del réxime de drechos humanos de los pueblos indíxenes.

»El drechu al consentimientu previu, llibre ya informáu de los pueblos indíxenes n’asuntos que puedan eventualmente afeutar al plenu y efeutivu esfrute de los sos drechos fundamentales.

»El drechu a la plena observancia de los alcuerdos y arreglos constructivos a los que talos pueblos lleguen, o tengan llegao, colos Estaos, señalando los mecanismos internacionales de la solución de los conflictos derivaos de la interpretación de talos alcuerdos.

»Igualmente, proclama y reconoz el drechu de los pueblos indíxenes a participar activamente nel diseñu, planiamientu, execución y, en xeneral, en toles fases del ciclu de los proyeutos de cooperación internacional al desarrollu.

»Puntu númberu 2. La Xunta Xeneral del Principáu alcuerda encamentar al Conseyu de Gobiernu d’Asturies:

»Primero, que promueva’l debate y la sensibilización de la ciudadanía asturiano, en particular de la mocedá y el voluntariáu, sobre la situación de precariedá y desdexu de la que son oxetu los pueblos indíxenes en tol mundiu, fomentando una educación en valores y la diversidá cultural.

»Segundo, qu’incluya nel futuru Plan Direutor de Cooperación al Desarrollu una referencia esplícita ya inequívoca de la defensa de los drechos de los pueblos indíxenes como prioridá sectorial y/o tresversal, articulando les modalidaes y preseos específicos de cooperación necesarios pa llevar a efeutu la reconocencia de talos drechos.

»Tercero, que cree un serviciu, o unidá especializada, pa los pueblos indíxenes, dientro de l’Axencia Asturiana de Cooperación.

»Cuarto, qu’ellabore, en collaboración colos actores sociales implicaos, incluyendo a representantes de los pueblos indíxenes, una estratexa asturiana de cooperación colos pueblos indíxenes.

»Y, quinto, qu’incremente la dotación presupuestaria de los instrumentos y modalidaes de cooperación al desarrollu, destinada a los pueblos indíxenes, a traviés, en particular, del apoyu a la educación en drechos humanos, y a l’ayuda d’emerxencia en drechos humanos.Xunta Xeneral del Principáu.

Uviéu a tal de tantos...