Segunda
Selmana de Comerciu Xustu y Soberanía Alimentaria.
13 al 19 de marzu
La Pola
Conceyu Siero
Xornada
sobre
"Soberanía alimentaria, producción ecolóxica
y comerciu alternativu"
el sábadu 18, na Casa la Cultura.
¿Qué ye la “soberanía alimentaria”?
La soberanía alimentaria ye’l DRECHU
de los pueblos, de los sos países o de les xuntures d’estados
a definir la so política agraria y alimentaria contra terceros
países.
El conceptu de soberanía alimentaria desarrolláralu
Vía Campesina y debatiérase públicamente
na Cumbre Mundial de l’Alimentación de 1996, y ufierta
una alternativa a la política neolliberal. Dempués
d’aquello, el conceptu va convertise nun tema perimportante
del debate agrariu internacional, de manera que llega hasta les
Naciones Uníes.
El conceptu de soberanía alimentaria tien munchos factores:
• Ye’l drechu de los pueblos a producir el so alimentu
nel so territoriu, a l’autosuficiencia de los productos
alimenticios básicos y a participar na definición
de la política agraria.
• Ye’l drechu de les persones a decidir lo que quieren
consumir, cómo, ónde y quién lo produz.
• Ye’l drechu de cada país, a definir una
política agraria propia y a marcar les obligaciones de
calidá y frescura pa los alimentos, y al tiempu pue pidir
el mesmu nivel de desixencia a les importaciones qu’a
los productos interiores.
• Ye’l drechu de los llabradores a tener tierra,
agua, semiente y creitos.
• Ye’l drechu de los Estaos o de les sos xuntures
d’ellos a defendese de les importaciones a precios tiraos,
o lo que ye lo mesmo, a defendese del dumping.
• Ye la reconocencia de los drechos de los llabradores,
que tienen un papel perimportante na producción agraria,
na alimentación y na conservación de la biodiversidá
y del padremuñu cultural y natural.
¿Qué ye’l dumping?
El dumping consiste en vender productos nun mercáu per
baxo del preciu coste. Suel dase a resultes de los subsidios y
subvenciones que reciben mesmo la producción que la esportación,
anque nun dexen de ser les esplotaciones grandes y les empreses
agroindustriales les que se beneficien d’esti tipu de subvenciones.
Cola política neolliberal pola que nos mandamos anguaño,
dase’l dumping lo mesmo nel comerciu Norte-Sur que nos intercambios
Sur-Norte y Sur-Sur.
D’una manera o d’otra, el dumping ye una práctica
qu’arruina a los productores locales pequeños, igual
nos países d’orixe que nos de destín.
Un exemplu perclaru de dumping ye la importación mexicana
de maíz a precios perbaxos que vien de los EE.UU. y que
ta arruinando a los productores mexicanos de granu. D’otra
parte, la verdura barato de México arruina a los llabradores
de Canadá.
Vía Campesina ye un movimientu
internacional que coordina organizaciones campesines, de productores
rurales pequeños y medianos, de llabradores, de muyeres
del campu, y de comunidades indíxenes d’Asia, África,
América y Europa.
L’orixe de Vía Campesina hai que buscalu n’abril
de 1992, cuando se reunieron en Managua, Nicaragua, dellos líderes
llabradores, d’América Central, de Norteamérica
y d’Europa, nel congresu de la Unión Nacional de
llabradores y Ganaderos (UNAG). En mayu de 1993 celebraron la
so conferencia primera na ciudá de Mons (Bélxica),
dempués ficieron la segunda n’abril de 1996, en Tlaxcala
(México), la tercera nel añu 2000 en Bangalore (India)
y la cuarta en Sao Paulo (Brasil), en 2004.
Con más de 97 organizaciones, Vía Campesina ye una
de les fuercies más importantes contra la globalización
neolliberal.
La política neolliberal acaba cola soberanía
alimentaria
- La política neolliberal prioriza’l comerciu
internacional y non l’alimentación de los pueblos.
- Nun ayuda pa nada a acabar cola fame nel mundu. De fechu,
agrandó la dependencia de los pueblos de les importaciones
agrícoles, y reforció la industrialización
na llabranza, poniendo en peligru’l padremuñu xenéticu,
cultural y medioambiental del planeta, mesmo que la salú
de nueso.
- Obligó a centenes de millones de llabradores a dexar
los métodos tradicionales, al éxodu rural o a
la emigración.
Instituciones internacionales como’l FMI (Fondu Monetariu
Internacional), el Bancu Mundial y la OMC (Organización
Mundial del Comerciu), aplicaron esta política pensando
nos intereses de les empreses tresnacionales y de les grandes
potencies.
Los alcuerdos internacionales (OMC), rexonales (Alcuerdu de Comerciu
Llibre pa les Amériques-ALCA) o billaterales de cambiu
"llibre" de productos agrícoles déxen-yos
a estes empreses controlar el mercáu globalizáu
de l’alimentación.
Definiría la mundialización como la llibertá
que tien el grupu míu d’invertir onde quiera y
cuando quiera, pa producir lo que vea, aprovisionándose
y vendiendo onde-y paeza y teniendo cuantes menos obligaciones
meyor en drechos llaborales y convenciones sociales (Percy Barnevik,
presidente ABB Asea Brown Boveri, miembru de la Table Round
des Industriels Européens y del grupu Bildeberg).
L’accesu a los mercaos internacionales nun ye
solución pa los llabradores
El problema de los llabradores ye, sobre manera, la falta d’accesu
a los mercaos locales por cuenta de los precios tan baxos a los
que se pagen los sos productos y del dumping nes importaciones
que los ta afogando. L’accesu a los mercaos internacionales
llega namás qu’al 10% de la producción mundial
y tá controláu poles empreses tresnacionales y poles
principales empreses agro-industriales.
L’exemplu de los productos tropicales ye claru nesti casu:
benefíciense d’un accesu prácticamente llibre
nos países del Norte y por embargo les families llabradores
del Sur nun tuvieron ganancia nin meyora nenguna.
Les protestes contra la OMC (WTO)
son ún de los exes de la llucha campesina
¿Ye la soberanía alimentaria incompatible
col comerciu internacional?
La soberanía alimentaria inclúi un comerciu
internacional xustu. La soberanía alimentaria nun s’opón
a los intercambios. La soberanía alimentaria permite la
seguranza alimentaria de los pueblos y poder cambiar la producción
con otres rexones. Con too y con ello, ye necesario un marcu nuevu
d’intercambiu, controláu por Naciones Uníes
que:
• Dea prioridá a la producción local y
rexonal sobre la producción pa la esportación,
• Autorice a los estados/uniones a defendese de les importaciones
a precios mui baxos.
• Autorice les ayudes públiques a los llabradores,
a condición de que nun sirvan nin directa nin indirectamente
pa esportar a precios baxos.
• Garantice una estabilidá de los precios agrícoles
a nivel internacional al traviés d’alcuerdos internacionales
de control de la producción.
Hacia la Soberanía Alimentaria en Venezuela
L’Estáu ha promover l’agricultura sostenible
como base estratéxica del desarrollu rural integral,
col fin d’asegurar la seguranza alimentaria de la población
entendía como la disponibilidá suficiente y establez
alimentos nel ámbitu nacional y n’accesu oportunu
y permanente a estos por parte del públicu consumidor.
La seguridá alimentaria va algamase desarrollando y beneficiando
la producción agropecuaria interna, que s’entiende
que ye l’agrícola, la pecuaria, la pesquera y l’acuícola.
La producción d’alimentos ye d’ interés
nacional y fundamental pal desarrollu económicu y social
de la nación.
(Art. 305 de la Constitución de la República Bolivariana
de Venezuela)
¿Qué ye l’Agricultura Ecolóxico?
Ye una agricultura sano que trabaya cola tierra respetando’l
so ritmu y l’equilibríu natural. Fai por nun contaminar
y por tar n’equilibriu col mediu, caltien la fertilidá
del suelu y la diversidá xenético. Los gastos directos
d’enerxía, matería primo y tiempu de trabayu
han ser razonables y equilibraos, y la ganancia individual nun
ha suponer perda o un déficit colectivu. Permite nun tar
atáu a los monopolios de los fertilizantes, de los pesticides
químicos y de la biotecnoloxía y nun va emprobeciendo
y envelenando a poco y a poco’l suelu.
Ún de los primeros alimentos tranxénicos
foi una fresa a la que se-y “implantara”
un xen d’un pexe del árticu.
Productos Ecolóxicos: son los que tán
fechos (de manera industrial o artesanal), semiellaboraos o frescos
y que se caractericen por nun ser dañinos directa o indirectamente,
col medioambiente nin cola salú de los consumidores.
(Cooperativa de Consumu Germinal – Catalunya)
¿Qué ye’l Comerciu Alternativo?
Ye una manera de cambiar bienes y productos nes que lo principal
ye cubrir les necesidaes humanes en cuenta’l beneficiu económicu.
Hai delles maneres, de les que destacamos:
El Comerciu Xusto: l’oxetivu primeru ye
actuar sobre les relaciones comerciales pa que los modos de producción
y de consumu evolucionen dende la perspectiva d’un desarrollu
sostenible y deseable por toos. Un desarrollu onde pa cubrir les
necesidaes de toos nun haiga qu’esplotar a los trabayadores
nin escosar los recursos, nin equí nin en neguna parte’l
mundu. Nel intercambiu dase más importancia a la calidá
de los términos del intercambiu qu’a la cantidá
de los productos intercambiaos.
(Minga – Cooperativa de Comerciu Xusto. Francia)
Una Cooperativa de Consumu ye una entidá
socioeconómica de propiedá colectiva, formada por
unos socios que comparten unos oxetivos comunes basaos na cooperación
y la voluntariedá, establecíes con llibertá
y que tien la finalidá de resolver, col consumu de productos
ecolóxicos, cuestiones d’orde social, llaboral, económicu,
ecolóxicu y de salú; y que participa d’un
movimiento social tresformador y progresista.
Les persones que la formen, son les ames a la hora de marcar el
destín propiu de la cooperativa de manera compartida.
(Monverd – Cooperativa de distribución de productos
d’alimentación ecolóxico. Barcelona)
Dalgunes páxines web rellacionaes:
Viacampesina.org
(Vía Campesina)
Biodiversidadla.org
(Biodiversidá Llatinoamericana)
Foodfirst.org
Cdrtcampos.es/plataforma_rural
(Plataforma Rural. España)
Ecoportal.net
Grr.org.ar (Grupo
de Reflexión Rural. Argentina)
Redtercermundo.org.uy
Confederationpaysanne.fr
(Confederación Campesina Francesa)
Rallt.org (Rede
por una América Llibre de Tranxénicos)
Rap-al.org
(Rede d’Acción en Plaguicides y les sos alternatives
n’América Llatina)
forocomerciojusto.org
27
de Febrero de 2006
