L’ahuehuete o ciprés mexicanu ye l’árbol nacional de México; l’ahuehuete ye un elementu de la naturaleza firmemente xuníu a la cultura nacional, dende la dómina prehispánica hasta los nuesos díes.

La hestoria d’esti árbol remóntase a munchos millones d’años, cuando’l grupu de les coníferes, al que pertenez esta especie, dominaba la tierra emerxío y formaba estensiones impresionantes de viesques primitives.

La pallabra “ahuehuete” provién del náhuatl y significa “vieyu del agua”, lo que fala del estraordinariu llargor de la so vida y de la so forma de medrar; “cedru de vida llarga” ye como-y dicen en zapotecu.

“Vieyu del agua, qué sedría del nuesu país y de la nuesa cultura ensin ti; carnalinamente mexicanu, afinques los tos raigaños no más fondo del suelu pa estrayer d’elli la vital esencia que te da vida.” [“Viejo del agua, qué sería de nuestro país y nuestra cultura sin ti; entrañablemente mexicano, hundes tus raíces en lo profundo del suelo para extraer de él la vital esencia que te da vida.”] Diz el poeta.

Exemplu d’ahuehuetes hestóricos alcontrámoslos nos famosos árboles del Parque Nacional El Contador, a 5 km de Texcoco, cabo’l pueblu de San Salvador Atenco. Estos maxestuosos exemplares plantáronse pa dar orniamentu y grandeza a ún de los xardinos del rei poeta Nezahualcóyotl. Los árboles enmarquen un gran rectángulu de 800 m de llargo por 400 m d’ancho y dizse que son los más trupos qu’hai na República; poro, el xeneral Lázaro Cárdenas declarólu parque nacional, sacándolu asina del repartu agrariu.

Dempués vinieron el neolliberalismu, les polítiques de privatizalo too al serviciu de los multimillonarios, y el Plan Puebla Panamá; y a los pobladores d’Atenco quixeron roba-yos los ahuehuetes, les tierres comunales, la vida.

Pero nun se dexaron. Y esa ye una delda que tola humanidá tenemos con aquellos pobladores.
El conceyu d’Atenco ta allugáu nel oriente del Estáu de México. Tien una estensión de 94.67 km2.
Alcuéntrase nel oriente d’una conca lacustre, y per ellí van dar los ríos San Juan, que ñaz en Teotihuacán; el Xalapango; y el Papalotla, que na actualidá tán convertíos en canales altamente contaminaes poles industries, con grandes cantidaes d’esperdicios.
El clima d’Atenco ye semisecu, con una temperatura promediu de 15.1°C, una máxima estrema de 33.5°C y una mínima de 11.0°C.
La flora ye abondoso, parte d’ello nativo, tevo y tien usos melecinales, p’alimentación y p’adornu, y consérvase gracies a la herencia de padres a fíos. Ente lo más representativo tenemos el maíz, maguey, tuna, nopal, zapote blanco, chichu, calabaza, quelite, cempasúchil, chayote, chilacayote, noche buena, ejote, xoconoxtle, tomate, epazote, chile jaltomate, jitomate, verdolaga, mirasol.

Parte d’esa flora nativo, tanto de tierra firme como de llagu ta desaniciándose, yá sía por abandonu del cultivu, pol secamientu del llagu o pola disminución del agua nos ríos y nes capes acuíferes: el tule, el carrizu, el chichicastle, el lliriu acuáticu, l’hizache, l’ahuehuete, el tejocote, el capulín, l’órgano.
N’Ixtapan, en tiempu d’agua, tovía se cueye nos champanes un tipu d’ocle, la espirulina, de gran riqueza proteica. D’esi ocle fala la escritora Belen Gopegui, que tevo nesta Casa la Cultura, na so última novela: El padre de Blancanieves.

Ente los animales, por mencionar sólo les aves: pites, gansos, pavos, gallos, pichones, palombes, coríos, zopilotes, tórtoles, cenzontles, calandries, andarines, colibríes, cuervos, garces, curuxes, coríos xabaces, chichicuilotes, águiles.

En San Salvador Atenco hai un cementeriu d’ahuehuetes a un llau del pueblu.

Trátase d’una reserva formosa y abandonada d’árboles vieyos, un sitiu au paeciera qu’acuden a morrer eses grandioses y vieyes coníferes mexicanes. Lo mesmo que la rexón ta estrada de murueques mesoamericanes, esti parque antiguu guarda otru tipu de ruines: tueros colosales d’hasta cuarenta metros d’alto con más de quinientos años de vida; munchos d’ellos son xigantes muertos echaos nel verde, onde añeren páxaros y esguiles; otros aínda tán en pie fitu, colos sos brazos llargos, restorcíos, arrugaos y fuertes -anque secos-. Paecen grupos d’elefantes, "enraxonaos, llonxanos..." [“coléricos, distantes...”], diría’l poeta cubanu Eliseo Diego.

Güei en día, al referise a Atenco, tol mundiu fala de machetes, pero naide d’ahuehuetes... Sedrá, quiciabes, porque esta reserva ye un espaciu d’esceición, un sitiu per onde nun pasa’l tiempu humanu: la hestoria.

Frente a los allaríos seculares, nesta zona impera’l más absolutu silenciu intemporal. Munchos d’esos árboles yá verdexaben pela formosa oriella del llagu de Texcoco de la que los tecpaneques facíen incursiones nesi territoriu, en llucha colos texcocanos. Diz la lleenda que seique ún d’esos ahuehuetes protexó al neñu Netzahualcóyotl de la muerte, porque esguiló peles sos cañes.

Tiempu dempués, el vieyu rei poeta tenía´l so paséu preferíu precisamente nesti parque.

Estos árboles de la sabiduría y la quietú foron testigos de la barbarie policial escontra los pobladores d’Atenco.

Col machete n’alto.

"El campu ye la nuesa vida. Equí crecimos y lluchemos, y equí tuviemos a los nuesos fíos. Nosotros tamos como arraigonaos nesta tierra. Nun mos puen arrincar asina ensin más. Si mos arrinquen, morremos ensembre". ["El campo es nuestra vida. Aquí crecimos y luchamos, y aquí tuvimos a nuestros hijos. Nosotros estamos como enraizados en esta tierra. No nos pueden arrancar así nomás. Si nos arrancan, de plano nos morimos"] Dicía una llabradora, una paisanina d’Atenco, en medio de la so heroica llucha escontra’l mega-aeropuertu que trataron d’impone-yos ensin consulta, saltándose les lleis mexicanes.

"Ésti ye’l corazón de México", proclama mui en serio Ignacio del Valle, ún de los cabezaleros d’Atenco, güei prisioneru políticu del gobiernu mexicanu.

Más allá d’esos bienes materiales d’enorme valor cultural, diz l’hestoriador Cruces Carvajal, Atenco ye "un conceyu onde l’home y la naturaleza mantuvieron per sieglos una estrencha y amorosiega rellación", lo que condiciona valores y costumes conservaos a traviés de los sieglos, y sobre too esplica’l fondu amor y respetu de los pobladores a la tierra.

"Nun saben lo que van destruyir", alvertía l’hestoriador.

“Agora, ¿yá entiende por qué lluchamos?” [" Ora, ¿ya entiende por qué luchamos?"], vuelve a resumir pal periodista, la vieya llabradora, la paisanina d’Atenco, que pue ser cualquiera de les nueses güeles.

Cuando se cumplía’l primer añu de la masacre policial n’Atenco, Amnistía Internacional, col so llinguaxe moderáu, sacaba un comunicáu dende Londres:

A un añu de la intervención policial en San Salvador Atenco (Estáu de México), na que se cometieron atentaos graves escontra los drechos humanos, talos como l’usu escesivu de la fuercia, homicidios illexítimos, tortures, detenciones arbitraries, agresiones sexuales y ataques al drechu a un xuiciu xustu, la impunidá sigue arguta.

Amnistía Internacional espresa la so fonda esmolición pola falta d’avances na investigación y sanción de los responsables d’estos atentaos a los drechos humanos. Estos ataques, que reconoció incluso la Comisión Nacional de Drechos Humanos (CNDH) y ministros de la Suprema Corte de Xusticia de la Nación (SCXN), entá nun s’investigaron curioso.

La conducta del Estáu y de los sos funcionarios siempre tendría de concasar coles normes internacionales de drechos humanos suscrites por México. El gobiernu federal habría demostrar el so lideralgu y cumplir coles obligaciones internacionales de drechos humanos, garantizando la investigación de funcionarios federales, estatales y del Conceyu de manera rápida, imparcial y minuciosa.

Los pocos avances nes investigaciones pa esclariar les muertes de los xóvenes Javier Cortés Santiago y Alexis Benhumea son motivu d’esmolición p’Amnistía Internacional.

La Fiscalía Especial pa l’Atención de Delitos Rellacionaos con Actos de Violencia contra les Muyeres habría d’exercer l’aición penal nos casos de les varies muyeres que, como Bárbara Italia Méndez, denunciaron con gran valor tener sufrío tortura, incluyendo violencia sexual, por parte de policíes. Estes muyeres aínda nun recibieron contestación dala.

Amnistía Internacional ve con muera que, magar la evidencia de los atentaos a los drechos humanos cometíos escontra deteníos/es, les autoridaes estatales solo acusaron a un policía d’actos lluxuriosos y a otros venti d’abusu d’autoridá, toos ellos delitos menores. Tales acusaciones nun reflexen nin la magnitú nin la gravedá de los ataques sufríos por muyeres y homes deteníos.

La impunidá por atentaos a los drechos humanos ye un factor mui arraigonáu en México y que ta torgando l’ameyoramientu na proteición d’estos drechos. Los fechos de San Salvador Atenco nun habríen ser otru casu más nesta llarga hestoria d’impunidá.

Güei ta entregándose un modestu premiu de drechos humanos en Siero a los pobladores d’Atenco, representaos en Marta y Saúl.

Ye un premiu modestu qu’engrandez al Conceyu Siero y enllaza con otros movimientos condecoraos: Los Ensin Tierra, Les Madres de Plaza de Mayo, Palestina, Colombia, etc.

Otru añu tuviemos la suerte de cuntar con otres dos persones de México, que veníen de Chiapas: una d’elles l’obispu don Samuel Ruiz.

Sabemos tamién del apoyu de don Samuel a los pobladores d’Atenco, de cómo dixo misa pola llibertá de los presos políticos, de cómo acompañó a la señora Trinidad, esposa y madre de dos presos y madre d’otra líder xovencina, de nome América, que tien que tar na clandestinidá por tener orde de captura de les fuercies represores mexicanes.

Diz la crónica que’l gobiernu mexicanu quixo vengase pol trunfu popular y llegal d’Atenco escontra la espropiación de 88.000 díes de gües (11.000 hectárees) de les sos tierres.

Tiempu dempués, el 3 y 4 de mayu del 2006, cerca de 3000 policíes federales, estatales y del Conceyu participaron nuna operación p’acabar coles protestes encabezaes pol Frente de Pueblos en Defensa de la Tierra (FPDT) en Texcoco y San Salvador Atenco.

La operación policial resultó cola detención de 207 persones, la muerte de dos civiles y decenes de manifestantes mancaos.

Polo menos 165 de les persones deteníes siguen metíes en xuiciu.

La Suprema Corte de Xusticia de la Nación, supuestamente nesti momentu, tien en marcha una investigación non xurisdiccional acerca de lo asocedío, y una senadora de 80 años, doña Rosario Ibarra, presentó una propuesta de Llei d’Amnistía, que contempla tamién otros fechos dolorosos y crueles de la represión, como’l d’Oaxaca.

Atenco: Tierra Sí, aviones Non, VIDA Sí.

La hestoria de San Salvador Atenco y otros pueblos de Texcoco ye la hestoria del trunfu d’una comunidá frente a los planes de gran envergadura, promovíos pol propiu Presidente de la República, pero sofitaos n’intereses económicos poderosos d’Estaos Xuníos, de multinacionales y d’empresarios mexicanos.

El proyeutu de mega-aeropuertu contemplaba amás árees estenses de promoción turística de lluxu nos alredores de les pirámides azteques.

Pero planes y negocios de grandor talu, pola so ambición descomanada, nun cuntaron con una comunidá, y nun cuntaron con Emiliano Zapata, qu’un sieglu dempués, reencárnase n’Atenco nos sos pobladores.

Amparaos en lleis comunales, frutu de la Revolución de va un sieglu, y de muncha movilización, los comuñeros d’Atenco fexeron una “controversia constitucional” pa enfrentase al decretu d’espropiación de la Presidencia.

El procesu foi llargu, hebo un muertu por apaliamientu de la policía y once presos, que finalmente los comuñeros llograron poner en llibertá tres añu y mediu de cárcel.

Y enteráronse pela televisión de que’l proyeutu presidencial fuera derrotáu.

Foi una “primer etapa”, que la xente d’Atenco califica de romántica: lluchóse, movilizóse muncho, ganóse, a un coste relativamente baxu de consecuencies si se compara con otres resistencies, que tienen resultaos más dramáticos.

Y preservóse pa la humanidá esi xardín onde moren los ahuehuetes.

Lo que pasó dempués, nel 2006, cola entrada de la policía a les cases a detener, y nel pueblu a reprimir, ta ampliamente filmao y fotografiao, pero los policíes ñeguen la evidencia y dicen qu’enxamás entraron al pueblu, y que detuvieron a los “delincuentes” nun corte de carretera.

Nesi enguedeyu absurdu y premeditáu de les audiencies que se tán celebrando estos meses, hai persones que s’enfotaron na xusticia, y resultaron tamién estafaes.

Mentanto, mientres equí entregamos reconocimientu a Marta y Saúl, ellí n’Atenco, p’asegurar la intimidación, helicópteros y avionetes siguen sobrevolando Atenco a les tres y a les cuatro de la mañana, creando psicosis policial.

Y los presos condergaos tán n’aisllamientu forzosu y nun permiten que les muyeres los visiten.

Oxalá que’l premiu internacional drechos humanos del Conceyu Siero contribuya a la lliberación de tolos presos y preses, a que la xusticia internacional faiga prevalecer los drechos n’Atenco, n’Oaxaca, en Guerrero, en Chiapas.

En tou casu, hai una delda con Atenco, de la humanidá entera, pol gran esfuerciu movilizador, de ciudadanía, de defensa de la Madre Tierra , de dignidá humana, pa col Frente de Pueblos de Defensa de la Tierra, d’Atenco, a la oriella del agua, a pocos quilómetros de les enormes pirámides de Teotihuacán, nel corazón de México, onde la sabiduría y quietú de los “vieyos del agua”, los ahuehuetes, foi atacada brutalmente pol capitalismu depredador.