 |
|
 |
 |
 |
 |
 |
 |
ley deuda
POSTURA DE LA CAMPAÑA “¿QUIÉN DEBE A QUIÉN?” FRENTE A LOS PROYEUTOS DE LLEI DE REFORMA DEL FAD / CESCE  Campaña ¿Quién debe a quién? – www.quiendebeaquien.orgEl 7 d’avientu del añu 2006 entró en vigor la Llei Reguladora de la Xestión de la Delda Esterna (38/2006). Nel articuláu d’esta llei podemos alcontrar l’allugamientu d’una reforma de los dos grandes mecanismos xeneradores de delda pal Estáu español: los creitos del Fondu d’Ayuda al Desarrollu (FAD) y los fallos de los seguros de creitu a la esportación otorgaos pola Compañía Española de Seguros de Creitu a la Esportación (CESCE). Con cuasi dos años de retrasu’l gobiernu presentó nel Congresu de los Diputaos dos proyeutos de llei colos que pretende cumplir cola obligación de reformar FAD y CESCE: la del Fondu pa la Promoción del Desarrollu (FONPRODE) y la de Reforma del Sistema d’Apoyu Financieru a la Internacionalización de la Empresa Española (que contempla la creación del Fondu d’Internacionalización de la Empresa – FIEM y la reforma de CESCE). Organizaciones diferentes de la sociedá civil lleven trabayando y reclamando incansablemente durante estos años la reforma de los FAD y CESCE y tamién denunciando la falta de tresparencia y calidá de los diferentes procesos de xeneración de delda y les repercusiones nos pueblos del Sur. Que nun les invitaren a participar na redacción de los proyeutos de llei y, en lleéndolos, el papel y posibilidaes reducíes que-yos otorga nel siguimientu de les actuaciones futures con cargu a FONPRODE, FIEM y CESCE, supón un retrocesu nel exerciciu de la participación democrática necesaria p’asegurar el bon usu de los fondos públicos. Dende la campaña “¿Quién debe a quién?” proponemos esti documentu, basándose nes nueses esmoliciones y demandes, que mos paecen claves p’acabar cola problemática de la delda y voltiar la situación que sufren los pueblos del Sur, cola fin de que se tengan en cuenta nos testos de llei que se tán tramitando nel Parllamentu. Pa cualquier consulta y/o aclaración sobre’l mesmu podéis ponevos en contautu con nós nesti corréu electrónicu: quiendebeaquien.estatal@gmail.com. PROYEUTU DE LLEI DEL FONDU PA LA PROMOCIÓN DEL DESARROLLU (FONPRODE)  1.
Esi proyeutu de llei tien que contemplar l’auditoría de tolos creitos
FAD emitíos hasta agora pol Estáu español a países de renta menor,
l’establecimientu d’un mecanismu que permita auditar les deldes que se
xeneren a partir d’agora con mecanismos como FONPRODE, y tamién la
cancelación y esixencia de responsabilidaes en rellación a los creitos
declaraos como illexítimos por eses auditoríes.Pa “¿Quién debe a quién?” la posibilidá de realizar auditoríes de delda ye una de les demandes principales qu’habría contemplar el proyeutu de llei del FONPRODE; llamentablemente tovía nun ta recoyida. Abúltamos que les auditoríes son una ferramienta de control democráticu eficaz daveres, que diba permitir conocer l’orixe de les deldes y fundamentar l’anulación o’l refugu de toles deldes que se consideren illexítimes. Son illexítimes aquelles deldes que proceden d’empréstamos qu’atenten a la dignidá de los ciudadanos, comprometen los drechos humanos, los drechos económicos, sociales y culturales o los principios de drechu reconocíos internacionalmente. Ye importante señalar qu’hasta agora nunca se fexo nenguna evaluación d’esti tipu nel Estáu español. Nun ye irrelevante qu’incluso l’espertu independiente de la ONX en delda esterna y drechos humanos, el señor Cephas Lumina, aconseye a los gobiernos auditar tola delda que reclamen a terceros países, cola fin de conocer l’orixe llegal y llexítimu de la mesma. Dende’l nuesu puntu vista, esti procesu tien que se realizar conxuntamente ente les sociedaes civiles del Norte y del Sur y los parllamentos implicaos. Ye precisamente nesti momentu en que les ferramientes nueves, como’l FONPRODE, van derogar los creitos FAD, cuando tenemos que garantizar que se pue evaluar caún de los creitos FAD reclamaos. En casu contrariu, y si a la final se tresfirieren los activos y pasivos del FAD, el saldu de la cuenta de l’Ayalguería del FAD y los importes de principal, intereses o comisiones devengaos y cobraos d’esi fondu al nuevu FONPRODE, tal y como contempla’l testu, corremos el riesgu de perder la buelga de los creitos que xeneraron la delda reclamada. Per otru llau, mentanto s’auditen estos creitos esiximos que se declare un aplazamientu de tola delda que los países del Sur tienen col Estáu español. Procediendo d’esta manera taríemos na llinia de lo solicitao pol Secretariu Xeneral de la Conferencia de la ONX sobre’l Comerciu y Desarrollu (UNCTAD), referente a la necesidá de llevar a cabo un aplazamientu unillateral del cobru de la delda (y tamién de los intereses), dada la situación difícil pela que traviesen munchos países endeldaos. 2. Paezmos que’l FONPRODE tien qu’apostar dafechu poles donaciones deslligaes en países de renta más pequeña que la española, yá que se trata d’un preséu d’Ayuda Oficial al Desarrollu (AOD). Nesti sen, dende “¿Quién debe a quién?” defendemos qu’hai qu’eliminar l’usu de preseos crediticios en países de renta menor que la española. Y tamién defendemos que’l FONPRODE tien que desvincular toles sos operaciones. Ello inclúi, sobre manera, les situaciones de guerra o catástrofe, en contra de lo que contempla’l testu. El testu actual del FONPRODE elimina, de mano, el creitu lligáu, pero entá caltién el creitu deslligáu, que contabiliza como AOD, incluso pa los países más emprobecíos y perendeldaos (HIPC) (art. 2.2). Per otru llau, el FONPRODE abre la puerta a aportaciones lligaes (nun s’especifica si como creitu o non) cuando ‘la urxente execución de l’ayuda venga xustificada por situaciones de guerra o catástrofe qu’esixan entamar les aiciones con mayor rapidez’ (art. 2.3).  3. Consideramos que nun hai que contribuyir con fondos públicos a les Instituciones Financieres Multillaterales – IFIs.
Eso implica les que contempla’l FONPRODE y tamién a los fondos del
antiguu «Fondu d’Ayuda al Desarrollu pa Instituciones Financieres
Internacionales y pa la Xestión de la Delda Esterna (FIDE)», qu’agora
xestionaría’l Ministeriu d’Economía y Facienda. Dende “¿Quién debe a
quién?” consideramos que les instituciones financieres internacionales
son responsables de tener impuesto a los países del sur polítiques
económiques, reformes xurídiques ya institucionales y procesos
d’endeldamientu que tuvieron impactos graves nes economíes y los
drechos humanos de los pueblos del Sur.Sicasí, la llei del FONPRODE prevé la contribución a ‘Fondos Temáticos Sectoriales n’Instituciones Financieres Internacionales destinaos a la satisfacción de les necesidaes sociales básiques nos países en desarrollu nes árees de salú, educación, accesu al agua potable y saniamientu, xéneru, y agricultura, desarrollu rural y seguridá alimentaria; aportaciones a los programes y fondos pa la evaluación d’impactu en dichos sectores y aportaciones a fondos multidonantes xestionaos o alministraos por instituciones financieres internacionales y destinaos a países concretos en situaciones de post-conflictu o fráxiles’ (art 2.1.e). 4. Defendemos que ye imprescindible qu’haya mecanismos públicos de control y evaluación pa verificar que se cumplen daveres los puntos anteriores, y tamién un compromisu pa realizar evaluaciones ex ante y ex post pa toos y caún de los proyeutos financiaos con Ayuda Oficial al Desarrollu. Nel proyeutu del FONPRODE hai una seición dedicada al siguimientu, evaluación y control de los proyeutos (artículos 11 y 12). De toles maneres, faltaría conocer cómo y con qué criterios se va faer. Pela so parte, anque l’artículu 11 fai referencia a que’l sistema d’evaluación y control va ser el marcáu pol Plan Direutor de Cooperación Española, hasta’l momentu estos criterios nun se pudieron aplicar mayormente por falta de tresparencia na información rererida a la xestión de los fondos pal desarrollu anteriores, los FAD. Esta llei nueva nun prevé nenguna meyora sobre ello. Nel mesmu sen, l’artículu 12, de control parllamentariu, tendría que ser muncho más esplícitu a la hora de garantizar l’accesu a la información sobre les operaciones aprobaes, les operaciones formalizaes, les empreses axudicataries, los sectores productivos destinatarios de la financiación con cargu al fondu y, en xeneral, el desarrollu de les operaciones en cursu a lo llargo del periodu contempláu; tamién l’importe, país de destín y condiciones de les operaciones autorizaes pol Conseyu de Ministros con cargu a esi fondu. A pesar de tolo previsto, paezmos que los mecanismos de control y evaluación previstos en FONPRODE son tovía mui escasos y poco definíos. Poro, consideramos insuficiente y arriesgada la falta de detalle y la incidencia na tresparencia de la xestión, evaluación y control de FONPRODE. Nesti puntu esiximos que sía’l parllamentu’l que controle, evalúe y hasta apruebe la idoneidá o non d’un creitu per aciu d’una comisión adhoc onde, como mínimo, haya paridá de componentes de la sociedá civil (ONGD y persones espertes nel tema) y del parllamentu. Esta comisión habrá espublizar regularmente un llistáu de les empreses que xeneraren impactos negativos (medioambientales, económicos, culturales y sociales) nes poblaciones del Sur, y que queden por ello inhabilitaes pa recebir fondos públicos. 5. Paezmos que’l FONPRODE tien que se xestionar de manera esclusiva ya independiente dende’l Ministeriu d’Asuntos Esteriores y Cooperación (MAEC), yá que defendemos qu’hai que deseparar de la cooperación al desarrollu cualquier tipu de xestión financiera o creiticia que se derive del manexu d’estos fondos. Poro, consideramos que’l papel del Ministeriu d’Economía y Facienda pa la xestión del FONPRODE ye innecesariu dafechu. El testu del FONPRODE prevé qu’ésti se xestione principalmente dende’l MAEC, anque non solo, yá que pa la xestión de recursos de creitos deslligaos ríquese l’autorización del Ministeriu d’Economía y Facienda (MEF). Lo mesmo asocede coles aportaciones de financiación a fondos temáticos sectoriales constituyíos n’instituciones financieres internacionales, en que la suscripción cola institución financiera internacional receptora correspuende a la vicepresidenta segunda del gobiernu y ministra d’Economía y Facienda, como gobernadora por España nes instituciones financieres internacionales. Per otru llau, el MEF va tar presente nel Comité del Fondu pa la Promoción del Desarrollu, que ye’l muérganu encargáu del estudiu de les propuestes de financiación con cargu al FONPRODE, polo que’l MAEC nun tien independencia pa decidir. PROYEUTU DE LLEI DE REFORMA DEL SISTEMA D’APOYU FINANCIERU A LA INTERNACIONALIZACIÓN DE LA EMPRESA ESPAÑOLA (FIEM/CESCE)  Esti proyeutu de llei pon en cuestionamientu’l principiu de coherencia de polítiques pal desarrollu.
A pesar de que’l testu diz que va cumplir con tal cometíu, nun
garantiza cómo se va faer posible. Amás, hai un númberu creciente
d’investigaciones que revelen de manera rigorosa hasta qué grau les
empreses españoles xeneraron impactos sociales, ambientales, culturales
y económicos negativos nos países emprobecíos. Y nun hai pruebes de que
la so presencia contribuyere a ameyorar les condiciones de vida d’estes
poblaciones. Poro, oponémosmos a qu’haya mecanismos como’l CESCE y otros fondos como la propuesta del FIEM.En casu de qu’estos instrumentos se caltuvieren, dende ‘¿Quién debe a quién?’ consideramos que lo mínimo que tendría que se tener en cuenta son los puntos qu’esponemos a continuación. Ello ye, polo que respeta al Fondu d’Internacionalización de la Empresa – FIEM: 1. Pensamos qu’en nengún casu’l FIEM tien de computar como ayuda oficial al desarrollu (AOD), yá qu’entendemos que tola AOD tien de ser en forma de donación y deslligada. L’artículu 14.2 del articuláu prevé la posibilidá de contabilizar como AOD “aquelles operaciones que cumplan los parámetros y directrices qu’estableza’l departamentu competente en materia de cooperación al desarrollu, acordies coles directrices del Comité d’Ayuda al Desarrollu de la OCDE, el Plan Director de la Cooperación, los Planes Añales de Cooperación Internacional y demás documentos indicativos de la política de cooperación al desarrollu”. Dende ‘¿Quién debe a quién?’ exiximos que l’articuláu impida esplícitamente la contabilización del FIEM, y tamién la posible renegociación y/o condonación de los activos (artículu 8.6) como AOD. 2. Pensamos qu’en nengún casu s’han otorgar creitos lligaos a intereses comerciales a países con menor renta que la española. En tou caso, nunca s’habríen otorgar a países emprobecíos y altamente endeldaos (HIPC – Heavily Indebted Poor Countries) / países menos adelantaos / países con ingresos baxos (LIC – Low Income Countries) / países con un índiz de desarrollu humanu baxu / países fráxiles (definición usada hai poco pol CAD y el Bancu Mundial) / países altamente endeldados de renta media. El capítulu 2 del proyeutu de llei que se refier al “funcionamientu del fondu” estipula que l’apoyu financieru de FIEM fadráse principalmente baxo la forma de “empréstamos, creitos y llinies de creitu”. Los beneficiarios del fondu podrán ser “Estaos, alministraciones públiques rexonales, provinciales y llocales estranxeres, instituciones públiques estranxeres, y tamién empreses públiques y privaes estranxeres”. Estos beneficiarios habrán garantizar les operaciones crediticies aportando garantía soberana. Esto implica de manera evidente una mayor xeneración de delda esterna. 3. Defendemos que tien qu’haber una garantía esplícita del cumplimientu d’obligaciones, pautos y trataos internacionales de drechos humanos (DDHH), mediu ambiente, anticorrupción, en vez de citar solo la responsabilidá social corporativa, que nun ye de cumplimientu obligáu. Nesti sen, mediante’l FIEM tamién se tien que prohibir esplícitamente la venta de material militar, policial y/o d’usu doble. 4. Ye indispensable qu’haya mecanismos de control, siguimientu y evaluación ex ante y ex post p’autorizar o non la financiación de proyeutos nel estranxero, que garanticen la tresparencia y participación ciudadana del Estáu español (parllamentu y sociedá civil) y de les poblaciones afectaes nos países receptores de la inversión. Nesti sen, ye menester la presentación d’informe semestral al parllamentu mediante una comisión ad hoc na qu’haya paridá de componentes de la sociedá civil y la publicación de les operaciones aprobaes, les operaciones formalizaes, les empreses axudicataries, los sectores productivos destinatarios de la financiación con cargu al fondu y, en xeneral, el desarrollu de les operaciones en cursu a lo llargo del periodu contempláu, y tamién l’importe, país de destín y condiciones de les operaciones autorizaes con cargu a esi fondu. Esta información habrá de faese pública na páxina web del Ministeriu d’Industria, Turismu y Comerciu.  5. Ye imprescindible qu’haya
mecanismos sancionadores llegales en casos de vulneración de drechos
humanos y delitos de corrupción por parte de tolos actores que
participen en cualquier momentu de los proyeutos del FIEM, lo
mesmo pa les empreses que pa les alministraciones españoles y
estranxeres. El capítulu 2 del proyeutu de llei (artículu 5) estipula
que nos contratos financiaos con cargu al FIEM, “el
beneficiariu ta obligáu, con caráuter previu a l’autorización de la
financiación, a supeditar esa financiación al cumplimientu por parte
del axudicatariu de lo establecío nos alcuerdos internacionales qu’en
materia de responsabilidá social, medioambiental y normes rellatives a
la prevención de práutiques corruptes, suscriba España, na so condición
d’Estáu financiador de proyeutos en terceros países”. Esto
implica que son los países y empreses terceros los qu’han asumir una
responsabilidá nel cumplimientu de les normes, pero nun implica una
responsabilidá asemeyada o acordies, por parte de les empreses
españoles a les que se-yos contraten los servicios. Polo tanto, esa
propuesta implica una ausencia dafechu de corresponsabilización d’estes
empreses, y tamién l’ausencia de mecanismos que velen pol cumplimientu
de les normes referíes. Polo que respecta a los seguros qu’otorga CESCE:1. Esmolezmos sobre manera qu’haya un incumplimientu col compromisu de llexislar sobre CESCE, tal y como obliga la disposición transitoria tercera de la Llei 38/2006, reguladora de la Xestión de la Delda Esterna. 2. Paezmos imprescindible faer auditoríes de los fallos de los proyeutos aseguraos pol CESCE, yá qu’en bien de casos les deldes comerciales adquiríes por terceros países incumplen los requisitos de llexitimidá del puntu vista social, ambiental, comercial y/o políticu. Nel casu de qu’hubiere evidencies d’illexitimidá, requeriríase la cancelación d’eses deldes, y tamién un reconocimientu de les responsabilidaes de los actores implicaos. 3. En casu de que’ gobiernu insista en mantener esti instrumentu y n’ares d’una coherencia de polítiques colos compromisos del Estáu español a nivel internacional y estatal colos drechos humanos, el desarrollu y la defensa del mediu ambiente, dende ‘¿Quién debe a quién?’ vemos indispensable tener en cuenta, como mínimo, les mudíes siguientes: Esixencia de tresparencia y de garantíes énte la corrupción.
Esto implica una resolución de la contradicción ente la Orde
ECO/180/2003, na que s’ampara CESCE pa reivindicar la más estricta
confidencialidá sobre los proyeutos y datos de los aseguraos; y el
drechu del accesu a la información de cualquier ciudadanu/a del Estáu,
estipulao na Llei 27/2006. De la mesma miente, paezmos imprescindible que CESCE tea obligada a espublizar na so páxina web tolos proyeutos que ta evaluando y/o a los qu’apoyó. Esclusión de tou tipu d’apoyu mediante seguros de CESCE a proyeutos que potencialmente puen permitir l’ataque a los drechos humanos y a drechos económicos, culturales y sociales. Amás, requerimos midíes llexislatives qu’aseguren la corresponsabilización y l’establecimientu de mecanismos sancionadores llegales que permitan la xudicialización de CESCE nos casos nos que s’aprobaren proyeutos d’esi tipu. Esclusión de tou tipu d’apoyu mediante un seguru de CESCE a proyeutos que comporten impactos ambientales graves, que xeneren más cambéu climáticu (industries estractives y banzaos) y/o qu’incluyan tecnoloxía nuclear. Prohibición esplícita pa que mediante un seguru de CESCE nun s’apoyen proyeutos que financien material militar, policial y de doble usu. Establecimientu de mecanismos qu’aseguren una implicación real de les poblaciones afectaes nel procesu de toma de decisiones de les evaluaciones ambientales, la planificación de les compensaciones y tresllaos. Son necesarios tamién mecanismos públicos de participación y control efectivu por parte de los parllamentos, actores sociales y les comunidaes afectaes. Campaña ¿Quién debe a quién? www.quiendebeaquien.org - quiendebeaquien.estatal@gmail.com ADHESIONES (a 21 d’avientu del 2009)ORGANIZACIONES Y REDES INTERNACIONALES
ORGANIZACIONES ESTATALES Y REDES LLOCALES
|
