cola guerra NUN se xuega

¡Cola guerra NUN se xuega! Dende l’añu 2006 vien celebrándose añalmente en Xixón el llamáu festival aereu, que consiste nel desfile d’unidaes del exércitu del aire, la marina, el cuerpu de paracaidistes, y tamién pilotos civiles d’acrobacies y equipos d’estinción de quemes y salvamentu. Amás, hai poco (mayu del 2010) tamién se desarrolló nesta ciudá una xornada nel marcu del día marítimu europeu na qu’hebo una demostración d’exercicios de les fuercies navales de la OTAN y del exércitu de la mar, ente otres. Consideramos qu’esti tipu d’eventos, presentaos a la ciudadanía como atracción turística, amazcaren en realidá actos de propaganda de los exércitos y les fuercies militares p’ameyorar la so imaxe pública y disminuir la percepción negativa que d’ellos tien la sociedá. L’atracción que supón la observación d’acrobacies o d’alta tecnoloxía úsase como escusa p’acercar a la sociedá’l poder militar del Estáu español, tratando de convencer al públicu de que les armes nun son tan peligroses y que son necesaries pa defender la paz. Mentanto, España sigue teniendo presencia militar en conflictos internacionales y sigue esportando armes a países onde nun se respeten los drechos humanos, convirtiéndomos asina en cómplices de les guerres qu’asoceden en países alloñaos del nuesu. Amás, tamos nun contestu de crisis económica nel que se mos pide a la ciudadanía faer un esfuerciu; recórtase’l presupuestu pa servicios básicos o públicos, incluyida la disminución de l’ayuda a la cooperación al desarrollu en 800 millones d’euros, mientres que’l gastu n’investigación militar, direutu ya indireutu, y el mantenimientu y meyora del exércitu representen un gastu aproximáu de 24.000 millones d’euros. Mui superior al gastu n’educación, servicios sociales, alministración pública (funcionariáu) y pensiones, que vieron recortáu ampliamente’l presupuestu esti añu y probablemente va siguir nos siguientes. Esti tipu d’actos suponen un gastu mui altu y superfluu dafechu pa les arques públiques, a pesar de que se quiera xustificar como una inversión que va trayer beneficios a la ciudá de Xixón. Sedría mui interesante conocer el costu real d’esta actividá, pero nun hai tresparencia. Lo que se cuenta ye que se reduz el presupuestu públicu, compensándolo con patrocinadores privaos como EADS Casa –empresa cola que l’Estáu español mantién un contratu d’armes dende 1997 por valor de 20.000 millones de €–. Esti datu solo ayuda a facemos duldar entá más del valor llúdicu de l’actividá en favor d’un valor publicitariu y de llaváu d’imaxe del exércitu. Paezmos vergonzoso que nun Estáu con más de 4 millones de persones desemplegaes, 125.000 persones probes n’Asturies, se siga aumentando añu tres añu l’aportación a los gastos militares y marafundiando cantidaes descomanaes de dineru de los y les contribuyentes en festivales d’exhibición militar. Queremos reivindicar unos principios de paz y non violencia, nos que fundamentamos el nuesu refugu del belicismu que s’escuende tres esti festival, y baxo’l que tán los mesmos valores de violencia, obediencia acrítica y despreciu pola vida humana que constituyen la base de los exércitos. Paezmos que nun ye coherente qu’una ciudá abierta como Xixón, que manifiesta públicamente la so esmolición pola solidaridá, la paz, el mediu ambiente o la interculturalidá, acueya esti tipu d’actos. Por too ello les persones y organizaciones que firmamos esti manifiestu solicitamos que’l Conceyu Xixón s’oponga a la realización d’eventos de carácter militar na ciudá de Xixón y trabaye por una sociedá llibre d’exércitos. Firmes: Coordinadora Asturiana de ONGDs http://www.kaosenlared.info/noticia/si-nos-encontramos-gran-crisis-mundial-paises-no-terminan-reducir-gast Armes españoles: http://www.nodo50.org/tortuga/La-venta-espanola-de-armas-bate http://www.nodo50.org/tortuga/Espana-armas-contra-los-derechos http://www.nodo50.org/tortuga/El-gasto-espanol-en-intervenciones Festivales aéreos de promocion de la muerte: http://www.antimilitaristas.org/spip.php?article4269&var_recherche=EADS http://www.antimilitaristas.org/spip.php?article4144&var_recherche=EADS