entrevista Nacho Glez per Bolivia y Chile

Nacho González de visita per Chile y Boliva ¿Per cualos sitios anduvisti? Bono de mano tengo que dicir que’l viaxe fixímoslu dos persones, yo y Viviana Catrileo que ye secretaria de l’Asamblea Mapuche d’Izquierda y militante del Partíu Comunista de Chile. Dígolo porque iguó munchos contactos y ayudóme enforma a conocer más la realidá política de Chile y sobremanera’l conflcitu mapuche. Salimos de Santiago y tiremos contra Bolivia parando en La Serena, Calama, Chuquicamata y San Pedro d’Atacama, a partir d’ehí Uyuni, Potosí, Sucre, Cochabamba, La Paz, L’Alto, Tiwanaku y Coroico. La ruta final foi esta y cambió un poco respecto a lo que se pensara de mano. ¿Cómo visti la situación de los mineros chilenos? D’esto tuviemos la oportunidá de falar con representantes sindicales y del Partíu Comunista de Chile en Calama. Ta viviéndose un procesu de privatización preocupante na minería y unes condiciones llaborales muncho peores pa los trabayadores de la minería privada que de la pública. Tán dándose munches facilidaes pa que la empresa privada abra mines con unes condiciones llaborales y ambientales llamentables. A lo último vimos como esbarrumbó la mina San José nel desiertu d’Atacama y quedaben 33 mineros dientro, de mano nun sabíen nin cuántos yeren, que tardaron mas de quince díes en dar con ellos y calcúlase que puen ser más de tres meses los que s’eche pa sacalos. Esta ye una mina privada que tenía denuncies de los sindicatos, y que tardó más d’ocho hores n’avisar a la familia de lo que pasara y munches más n’escomencipiar a trabayar pa sacar a los mineros. Foi un espectáculu llamentable, emprincipiando polos responsables de la empresa y acabando polos representantes políticos con Sebastián Piñera a la cabeza, un presidente de la república intentando figurar y que namás amosaba impotencia. Lo último son les declaraciones de los amos de la mina que dicen que nun hai seguru médicu nin pólices pa facese cargu de lo que vien, según ellos la compañía tinía problemes económicos y tando zarrada seguramente nun puedan cobrar nin los mineros que tán enterraos nin los que tán fuera. Una situación surrealista pa que l’estáu chilenu tenga que poner perres. Esta ye la socialización del sufrimientu, cuando les coses van bien ganen los de siempre y cuando van mal pagámoslo la mayoría, una mayoría a la que nunca-y toca lo guapo. ¿Qué espectives notasti col gobiernu de Piñera? Les espectatives son bien males, ye una vuelta de tuerca más si tenemos como referencia al gobiernu de la concertación. Ye un gobiernu del estilu de la derecha clásica estráu d’elementos de la estrema derecha heriede de Pinochet. Por exemplu nel casu del conflictu mapuche, la cosa va cada vez a peor, nun hai soluciones, la represión medra y nes cárceles hai una fuelga de fame de los presos mapuche que lleva más de mes y mediu con un bloquéu informativu total.   Nos medios de comunicación hai una censura enorme, namás sal qu’anden a la tema por si Piñera tien que vender les acciones de Colo Colo y hasta los diputaos de la UDI critiquen el populismu d’un presidente que fexo’l ridículo delantre tol pueblu por cuenta’l mundial de fúbol Pasasti per Chile nun momentu qu'habia una fuelga de fame de presos mapuche ¿Cuala ye la razón d'esa fuelga, y cuala ye la respuesta de la sociedá chilena nesti conflictu central? Les reivindicaciones de los presos políticos mapuche son que nun s'aplique la Llei Antiterrorista, que s'acabe col procesamientu doble civil y militar, la desmilitarización de les comunidaes y les zones en conflictu y la llibertá de tolos presos políticos mapuche. De momento son 32 los presos que participen y la respuesta de la sociedá chilena pues ye proble si quitamos los sectores más concienciaos y lluchadores. La izquierda ye la que participa nes protestes, bien la estraparlamentaria, o como nel casu del Partíu Comunista de Chile que se posicinó de mano incluso visitando un de los sos diputaos a los presos nos primeros díes. Falemos priemero del papel de los medios de comunicación empeñaos en tapecer cualquier protesta y como podéis suponer lo que sal tolos díes nos medios ye'l tema del rescate de los mineros que yá ye noticia hasta n'Europa. Tuvimos la oportunidá de participar en Santiago nuna movilizaición y nun yera muncha la xente.  Ye verdá que nos últimos díes tán siendo más grandes les marches y munches d'elles acaben con decenes de persones deteníes como pasó en Temuko hai quince díes. Hai una obsesión meditada políticamente de poner a los mapuche como los responsables d'un conflictu nel que son les víctimes. Cualquiera que tea en Chile dase cuenta que siempre que se fala de los mapuche nos medios, y ye tolos díes, ye pa falar de les acciones directes, de les detenciones y de xuicios. D'otra manera hai división dientro del movimientu na estratexa y na táctica a siguir p'algamar los sos derechos.  ¿En qué sitios de Bolivia pudistis tar? Como comentaba primero pudi andar una parte del altiplano mayormente. ¿Algunes zones en conflictu? El conflictu ye sinónimu de Boliva. Tienen unes organizaciones sociales bien fuertes que fueron a aparar la privatización del agua o la venta del gas, echaron presidentes y tán pendientes de tolo que pasa. Agora mesmo hai tensión colos Estaos Uníos por cuenta la USAID. Hai proyectos pa sacar litio d’Uyuni que nun ta mui bien visto pola xente de la zona y paez que de momento ta aparao. Hai expectativa por cuenta les presiones de Brasil pa facer macroproyectos, nun se pue dicir qu’haiga tranquilidá, más bien expectativa. Hai sectores insatisfechos col gobiernu del MAS, nel tema de les nacionalizaciones, nos derechos de los pueblos originarios o les concesiones polítiques a la estrema derecha mayormente nel oriente’l país. ¿Qué impresión tienes de la rellación d’Evo colos movimentos? Ye desigual, hai un sector qu’apuesta a muerte pol proyectu, paezme que son la base y el motor de lo qu’ellos y elles llamen l’instrumentu políticu, d’otra manera hai otru sector que ta decepcionáu y que dulda qu’Evo pueda algamar los cambios qu’ellos defenden. Tando ellí había contactos ente xente organizao fuera del MAS, yo nun m’atrevo a dicir que pueda salir d’eso, conociendo un poco la situación paez que seguramente coincidan más no que nun-yos presta que nes alternatives que puedan ufrir. ¿Qué zona de Bolivia t’impresionó más? Toes tienen el so encantu, seguramente impresionóme más tolo que ye’l Salar d’Uyuni y el desiertu que fai raya con Chile y esos Volcanes qu’estremen a los dos países, anque hasta hai poco más de cien años yera territoriu bolivianu. Agora paez que se puede resolver la salida de Boliva a la mar, de fechu Piñera y Morales falaron d’ello na reunión del MERCOSUR y van vese d’equí a poco tiempu p’igualo. Una de les soluciones que se ta viendo ye facer n’Arica una zona franca, pero esto tien otru problema, esa parte de Chile nunca perteneció a Bolivia porque yera del Perú, de momento ta’l capador enriba la gocha. ¿Qué otru país se te paez a Bolivia? La verdá que si soi sinceru nun sé lo que contestar, igual pola fuerza de les organizaciones indíxenes pueda ser Ecuador anque equí nunca fueron a ser una alternativa, non yá de poder, falo de gobiernu. ¿Qué impresión te paez que tien la xente boliviano de los europeos? De mano nun paez que sean xente sumiso colos europeos y eso préstame enforma. Hai un factor oxetivu si falamos de l’autoestima y a eso ayuda qu’Evo tea de presidente, nesti tema hai un consensu xeneral y da igual a quien-y preguntes. D’otra manera nun tienen razones pa venos bien, anque yo creo que saben estremar y nun caen na xeneralización.