Entrevista a Nacho Gonzalez per Perú. 

Pachakuti:- Pasasti la navidá y el fin d’añu n’El Perú, ¿Qué impresión traes? Nacho:- La impresión del tratu cola xente y les organizaciones nun pudo ser meyor, eso ye lo primero que quiero dicir. De magar llegué la collaboración del Partíu Socialista, del Institutu pal Desenvolvimientu y la Paz Amazónica (IDPA) y del Grupu Rede d’Economía Solidaria d’El Perú (GRESP) foi de dedicación al cientu por cientu pa poder conocer los proyectos y les organizaciones, ensin xente como Maruja Bedoya, Alfonso Cotera, Roberto Lay o Hugo Cabieses diba ser imposible en quince díes poder facer la xira. D’otra manera si te pares a pensar El Perú con Colombia y agora tamién con Chile son los países de Sudamérica con un proyectu neolliberal más claru, con esto nun toi diciendo qu’otros de la redolada nun lu tengan, pero nun se pue comparar. La desigualdá social ye mui grande, tienen una economía pensada mayormente pa la exportación, en munchos casos nin son a procesar la materia prima pa que siquiera-yos quede más valor añadíu. El país cada vez ta más en manes de les multiancionales y del capital tresnacional, lo público tien mui poco pesu y la protección ambiental ye bien ruina. Necesítase remocicar la constitución d’alantre atrás y ehí tienen que tar recoyíos ente otres coses los derechos de los pueblos indíxenes. P:- ¿Qué zones pudisti visitar? Nacho:- Tuvi na Rexón de Lima, y amás de la capital ehí tamién visité Villa Salvador y conocí de primer mano, con Alfonso Cotera, líder social y políticu na zona na dómina de los años 70 y 80 los procesos de tresformación social de la izquierda peruana, pue dicise que foi un llaboratoriu del que salieron munches coses bien bones y pa que negalo tamién decepciónes. Yá en llegando a la Rexón de San Martín conocí esperiencies en Tarapoto como’l centru pilotu de producción agroecolóxico, tuvi reuniones con xente de FRECIDES y del IDPA. Na provincia de Lamas pudi conocer una comunidá Quechua en Solo que pelea pon caltener el so territoriu y defendelu de les multinacionales y de los colonos qu’ocupen la tierra que ye d’ellos, equí hubo una pelea fuerte con una petrolera por cuenta unes prospecciones nun cordal que llamen “Cerro Escalera” y que depués de muncho pleitear ganaron, foi prestoso ver como calteníen perfectamente l’idioma. Tamién na provincia de Lamas tuvi en San Miguel, esti foi un pueblu mui castigáu pola guerra y foi zona lliberada pol MRTA. Subiendo contra arriba visitemos Shanao onde nes últimes elecciones una maniobra d’empadronamientu, ellí llámenlos “andarines”, fexo que la candidatura popular perdiera l’alcadía por menos de 50 votos, esi día acabemos viendo’l pueblu que más me prestó de tol viaxe, ye Morillo, ta nun cantu y la vista ye preciosa. En tolos llugarinos había conceyos abiertos y charrábemos cola xente. En Juanjui que ye la capital de Mariscal Cáceres tuvimos na toma de posesión del alcade qu’algamó una coalición d’izquierdes y tamién tuvimos un conceyu cola agrupación del Partíu Socialista que forma parte de la coalición y tien una conceyala. En Chazuta depués d’echar quilómetros per caleyes lleguemos a conocer les esperiencies de producción ecolóxico centraes mayormente nel consumu y el comerciu local, ehí tamién tuvimos un conceyu cola agrupación local del Partíu Socialista, esta ye una zona onde conviven Quechuas con xente mestizo como dicen ellí. Tambien entremos na Rexón de Loreto y visitemos Yurimaguas, ehí vímonos cola xente del Partíu Nacionalista d’El Perú d’Ollanta Humala y conocimos los dos puertos fluviales que tien el pueblu. Equí igual qu’en Tarapoto entrevistéronnos na televisión y na radio pa saber cómo vemos el so país dende fuera y falar un poco de too. P:- Tán en precampaña electoral, ¿nótase l’ambiente políticu? Nacho:- La precampaña marca’l día a día, non del debate políticu, de la vida peruana. Los medios de comunicación abren los informativos de la radio y la televisión igual que pasa coles portades de los periódicos. Na cai nótase que la xente fala d’ello, sobremanera nos taxis ye lo corriente. Falo de memoria pero pémeque son trece les candidatures que se presenten, munches d’elles son coaliciones de partíos. La izquierda depués de munches negociaciones nun foi a xuntase, una parte va col Partíu Nacionalista d’El Perú, son el Partíu Socialista, el Partíu Comunista, El Partíu Socialista Revolucionariu, el Movimientu Políticu Voz Socialista y Lima pa toos, la otra parte que se reconoz de centru izquierda y que se presenta cola sigla de Fuerza Social, Fuerza Social tien agora l’alcadía de Lima. Les negociaciones fueron dures y algún partíu acabó quedando fuera de nenguna coalición. Tamién se presenta Despertar Nacional onde participa Patria Llibre, equí hai polémica al postular Roberto Villar que foi del MRTA como segundo viceministru, el candidatu a presidente ye Ricardo Noriega. Ciertamente Ollanta Humala ta planteando coses diferentes y paez qu’una parte importante de la izquierda ta dispuesta a asumir el riesgu d’apoyar a un candidatu que tien fama de caudillista. El programa fala de reformar la constitución, de cambiar la política económica y el poder de les multinacionales, anque nesto nun ye mui claru, de doblar el presupuestu pa educación y de mirar pol mediu ambiente. Yo tuvi la oportunidá de tar nel actu central d’Ollanta coles organizaciones d’izquierda en Lima y ellí’l candidatu asumió compromisos públicamente aque de llegar a gobernar y concretase nun diben ser poca cosa viendo lo qu’hai. Precisamente nesti actu tuvo tamién el líder indíxena Alberto Pizango qu’anunció que tá nun había nada zarrao cola coalición anque’l fechu de presnetase nel actu animaba al optimismu anque paez se qu’a última hora tampoco se va presentar con Ollanta y les organizaciones d’izquierda. Esi ye’l mesmu determín que tomó Miguel Hilario del Partíu Pluralista d’El Perú. P:- ¿Qué valoración crees qu’hai en xeneral del gobiernu d’Alán García? Nacho:- Pues si facemos casu de les encuestes nun ye mui bona. Ye verdá qu’Alán nun se presenta y l’APRA agora mesmo ta sin candidata depués de que renunciara Mercedes Aráoz que niégase a llevar na llista a un ex ministru que ta investigáu por corrupción. Agora les encuestes dan favoritu a Toledo, segundu a Castañeda y tercera Keiko que ye la fía de Fujimori. Alán ta faciendo declaraciones que meten mieu, de mano amenazó con dar un golpe d’estáu si gana Ollanta y cuándo-y preguntó l’escritor Jaime Bayly cómo llegaba’l dinero, contestó-y que cuando se gobierna’l dinero llega solo. P:- ¿En Tarapoto y na Rexón de San Martín, qué población vive? Nacho:- Na rexón de San Martín viven sobre 1 millón de persones y la población va medrando, una parte grande ye indíxena y caltien l’idioma y la cultura propia anque la mayoría ye mestizo o criollo. La rexón divídese en 10 provincies y la capital ye Moyobamba, una de les provincies llámase tamién San Martín y la capital ye Tarapoto, esta ye la ciudá onde más xente vive de tola rexón. P:-   ¿Hai problema ellí cola deforestación? Nacho:- Hai un problema cola deforestación y gordu, los motivos son les plantaciones de monocultivu pa la esportación, café, cacao, palmito y palma aceitera mayormente, tamién hai problema coles infraestructures, coles empreses madereres, cola ganadería y cola minería y les empreses petroleres. Fálase de siguío de mirar pol monte pero na práctica’l modelu acaba colo qu’hai. Por suerte hai iniciatives centraes en llevar la tierra de manera tradicional, diversificando, nun gastanod trexénico nin químico, mirando pol comerciu local y l’autoconsumu que propón otru modelu que ye’l que yo comparto. Como diz el mio amigu Roberto Lay, primero pa la pota y depués lo que sobre yá lo venderemos. P:-  Fujimori ta na carcel y el so principal asesor Montesinos tamién, ¿quier esto dicir que la guerra y les consecuencies tán superaes? Nacho:- Yo pienso que nun tán superaes nin les causes, nin les consecuencies. El Perú sigue careciendo munches de les coses qu’emburriaron a qu’una parte importante de la población se revelara y algún garrara les armes. De les dos grupos armaos más importantes, ún yá dexó la llucha armada, el MRTA, y otru anque mui débil sigue con dos focos importante, Sendero Luminoso. Tá hai muncha xente na cárcel, algunos excombatientes cuando salen de la cárcel tienen problema pa integrase, les violaciones de los derechos humanos fueron constantes, xuicios sumarios, asesinatos, violaciones… D’otra manera una de les candidates y fia de Fujimori, Keiko, diz que’l so padre tuvo algún fallucu, como si robar y violar lo derechos humanos fuera una bobada. Muncha xente diz que si llega a gobernar va sacar al padre de la cárcel. P:- Pudisti tar cola madre de Victor Polay, líder presu del MRTA ¿cuala ye la situación d’esta antigua gerrilla? Nacho: Efectivamente’l MRTA yá dexó la llucha armada y una parte de la so xente tá ta na cárcel como ye’l casu de Victor Polay. Algunos militantes según fueron saliendo de la cárcel fueron escoyendo’l camín, unos dexaron la política, una parte importante milita ne partíos d’izquierda y algún en partíos de la derecha. Nun ye que se tomara una salida colectiva y homoxénea. P:- En Tarapoto hubo apoyu diez años de la cooperación asturiana a traviés de Les Segovies, ¿qué valoración faen? Nacho:- Efectivamente Les Segovies collaboró muncho nesta zona y el trabayu ta ehí pa vese, la cárcel vieya de Tarapoto dexó de ser un sitiu triste p’acabar siendo propiedá del IDPA y un puntu importante pa los movimientos que s’organicen y trabayen pola soberanía alimentaria. Como anécdota cuéntote que me prestó ver n’asturiano les plaques de l’Axencia Asturiana de Cooperación al Desarrollu de la dómina que lo xestionó’l Bloque por Asturies con Rafa Palacios a la cabeza. P:- Anguaño ye’l centenariu d’un escritor y políticu importante d’El Perú como José María Arguedas: ¿ pudisti ver l’ambiente previu a esta conmemoración? Nacho:- Pues sí, tengo que contate que ye bien vergonzoso, la figuar d’Arguedas tien un reconocimientu pergrande n’El Perú independientemente de la ideoloxía de la xente pero paez qu’Alán García ta empeñáu en tapecer la figura d’Arguedas.  Pa ello nun se-yo ocurrió otra fatada mayor que cellebrar l’añu del Machu Pichu,  primero de que Hiram Bingham naciera  los antepasaos de los pueblos orixinarios yá conocíen el Machu Pichu, incluso nuna llibreta de trabayu Bingham reconoz que’l que “descubrió” Machu Pichu foi Agustín Lizárraga’l 14 de xunetu de 1902, once años primero. Lo que ta claro ye que too val con tal de tapecer la figura d’Arguedas.